Telugu News

తాజా వార్తలు

నేషనల్ జియోగ్రఫిక్ బీ పోటీలలో ఇండియన్ అమెరికన్ల జైత్రయాత్ర కొనసాగుతోంది. ఇవాళ వాషింగ్టన్లో ఉత్కంఠభరితంగా సాగిన ఫైనల్లో తొలి మూడు స్థానాలలో వీరే నిలవటం విశేషం. నిహార్ జంగా విజేతగా నిలువగా, మల్లన్న ఆత్రేయ మరియు రిషి కుమార్ రెండు, మూడు స్థానాలు సాధించారు. 

విజేతకు $25000 స్కాలర్‌షిప్ తో పాటు జియోగ్రఫిక్ సొసైటీలో జీవితకాల మెంబర్‌షిప్ మరియు ఉచిత ట్రిప్ లభించనున్నాయి. నిహార్ జంగా టెక్సాస్ మిడిల్ స్కూల్లో 8th గ్రేడ్ చదువుతున్నాడు. ఈ అబ్బాయి 2016లో స్పెల్లింగ్ బీ విజేతగా కూడా నిలవడం గమనార్హం. రన్నర్-అప్ కు $10000, మూడవ స్థానంలో నిలిచినవారికి $5000, 10వ స్థానం వరకు నిలిచిన మిగిలినవారికి $1000 లభించనున్నాయి. ఈ సారి సెమీఫైనల్ కు చేరిన పది మందిలో తొమ్మిదిమంది ఇండియన్ అమెరికన్లే.    

1988లోప్రారంభమైన ఈ నేషనల్ జియోగ్రఫిక్ బీ పోటీలలో భారత సంతతికి చెందిన వ్యక్తి ఛాంపియన్ గా నిలవటం ఇది వరుసగా ఎనిమిదవసారి. నేషనల్ స్పెల్లింగ్ బీ పోటీలలో కూడా వీరే  వరుస విజయాలు సాధిస్తున్నారు. నేషనల్ జియోగ్రఫిక్ ఛానెల్లో ప్రత్యక్ష్య ప్రసారం అయిన ఈ పోటీని ఇక్కడ వీక్షించవచ్చు.

ఎన్నికలలో గెలుపొందటానికి దేశంలోని అన్ని రాజకీయపార్టీలు ఓటర్లను యథాశక్తి ప్రలోభాలకు గురిచేయటమే కాకుండా, గెలవడానికి వీలైన అన్ని అక్రమ మార్గాలను అనుసరించాయి. పోలింగ్ రోజున బూత్ స్థాయి మానేజ్‌మెంట్ విషయంలో అవి చూపిన క్రియేటివిటికి ఆశ్చర్యం కలగక మానదు. 

ఉత్తర ప్రదేశ్‌లో తమకు ఎలాగూ ఓటు వేయని ఒక వర్గం వారిని ఓటింగ్ కు రాకుండా చేసేందుకు ఒక జాతీయ పార్టీ డబ్బులు పంచినట్లుగా వార్తలు వచ్చాయి. డబ్బులు తీసుకున్నవారు ఓటు వేయకుండా ఉండేందుకు ముందుగానే వారి వేళ్ళకు సిరా గుర్తులను పెట్టడం చేసారట. 

ఇక తమకు ఓటు వేస్తారనుకున్న వారు ఓటు వేశారని నిర్ధారించుకోవటానికి ముందుగా బూత్ లోనికి వెళ్ళినవారు ఈవీఎంలో తమ పార్టీ గుర్తుపైన ప్రత్యేకమైన సిరాను అద్ధి, తర్వాత ఓటు వేసి వచ్చిన వారి చూపుడు వేలికి సిరా మరక ఉందో, లేదో చూసి మరీ డబ్బులిచ్చారట. 

- వరల్డ్ ఆఫ్ డాన్స్ కాంపిటీషన్ విజేత ముంబయికి చెందిన కింగ్స్ యునైటెడ్ 
- ఫైనల్లో తెలుగుపాట 

టెక్నాలజీ, సోషల్ మీడియా ప్రభావంతో మనదేశంలో హాలీవుడ్ సినిమాలను, టీవీ షోలను చూడటం ఎక్కువైంది. ఇటీవలే విడుదలైన ఎవెంజర్స్ ఎండ్ గేమ్ దీనికి ఉదాహరణ. అలాగే బాలీవుడ్ తరహా సంగీతానికి, నృత్య రీతులకు విదేశాలలో ఆదరణ లభిస్తుంది. అక్కడి తరహాలో మనదేశంలోకూడా దశాబ్ద కాలం నుండి రియాలిటీ షోలకు, ముఖ్యంగా డ్యాన్స్ షోలకు ప్రోత్సాహం, ఆదరణ పెరిగింది.

NBC ఛానెల్ సమర్పిస్తున్న వరల్డ్ ఆఫ్ డాన్స్ షోకి అమెరికాలో విస్తృత ఆదరణ ఉంది. ఈ కాంపిటీషన్లో దాదాపు అన్ని దేశాలకు చెందిన జట్లు పాల్గొంటాయి. ఈ సంవత్సరం వారు నిర్వహించిన మూడవ సీజన్లో ఆసియా దేశాలకు చెందిన జట్లు ఎక్కువ ప్రతిభ కనబర్చాయి. దానితో ఈసారి ప్రపంచవ్యాప్తంగా ఎక్కువ మంది ప్రేక్షకులు వీక్షించారు.

మనదేశం తరపున ముంబయికి చెందిన కింగ్స్ యునైటెడ్ జట్టు వరల్డ్ ఆఫ్ డాన్స్ సీజన్ - 3 లో పాల్గొంది. అయితే ఆరంభం నుండి విశేషమైన ప్రతిభతో ఫేవరేట్ గా పేరు తెచ్చుకుంది. ఈ రోజు జరిగిన ఫైనల్లో కూడా ప్రత్యర్థులకు అందనంత స్కోరుతో విజేతగా నిలిచింది. వారు స్పార్టన్ థీమ్ తో దేవిశ్రీ ఆడెవడన్న పాటను పెర్ఫార్మ్ చేయటం విశేషం. ఈ షోకు జడ్జ్ లుగా జెన్నిఫర్ లోపెజ్, నే-యో మరియు డెరెక్ లు వ్యవహరించారు.

కింగ్స్ యునైటెడ్ ఈ షోలో ప్రదర్శించిన అద్భుతమైన ప్రతిభను మనం ఇక్కడ చూడవచ్చు.











ఎందువల్లనో ఈ షో మన దేశ మెయిన్ స్ట్రీమ్ మీడియాను ఆకర్షించలేకపోయింది. ఈ షో ద్వారా కింగ్స్ యునైటెడ్ జట్టు మిలియన్ డాలర్ల నగదు, బాలీవుడ్ ప్రముఖుల, నెటిజన్ల ప్రశంసలతో పాటు ప్రపంచవ్యాప్తంగా పేరు సంపాదించుకుంది.  

జాతీయ పార్టీని ఏర్పాటు చేయాలంటే కనీసం నాలుగు రాష్ట్రాల్లో పోటీచేసి మొత్తం దేశంలో పోలైన ఓట్లలో ఆరు శాతం/ సీట్లలో రెండు శాతం  సాధించాలి. లేదా కనీసం నాలుగు రాష్ట్రాలలో ప్రాంతీయపార్టీగా గుర్తింపును పొంది ఉండాలి.    

తెలంగాణ రాష్ట్ర ముఖ్యమంత్రి కెసిఆర్ గారు కరీంనగర్ ఎన్నికల సభలో ప్రసంగిస్తూ అవసరమైతే ఎన్నికల తరువాత జాతీయ పార్టీని ఏర్పాటు చేస్తామని అన్నారు. అలా చేయాలంటే దేశవ్యాప్తంగా జరురుగుతున్న ఎన్నికలకు ముందే  సన్నద్ధమై ఉండాలి లేదా తరువాత వివిధ రాష్ట్రాలలో వచ్చే అసెంబ్లీ ఎన్నికలపై ఆధారపడాలి.  కానీ వేరే రాష్ట్రాలలో పోటీ చేసే బలంగానీ, ఉద్దేశ్యంగానీ తెలంగాణ రాష్ట్ర సమితికి ఉన్నట్లు కనిపించదు. ఆ పార్టీకి ఉన్న పేరు కూడా కేవలం ఈ రాష్ట్రానికి మాత్రమే పరిమితం అన్న భావనను కలిగిస్తుంది. బహుశా కెసిఆర్ గారు జాతీయ స్థాయిలో కూటమి ఏర్పాటు చేస్తామనే భావనలో జాతీయ పార్టీ అని ప్రస్తావించి ఉండవచ్చు.  

వినాయక పూజలో ఏకవింశతి పూజ అనేది ఒక ప్రధాన భాగం. ఏకవింశతి అంటే ఇరవై ఒకటి. గణనాథుడికి ఇష్టమైన సంఖ్య 21.ఈ పూజలో భాగంగా ఆయనను 21 రకాల పత్రితో పూజించటం మన ఆచారం. ఈ 21 రకాల పత్రి ఔషధ గుణాలను కలిగి ఉంటుంది. ఓం ఓషధీవతంతునమః అనేది కూడా వినాయకుని సహస్ర నామాలలో ఒకటి.

ఈ 21 రకాల పత్రి యొక్క ఔషధీ ఉపయోగాలు

మాచీపత్రం ఇది నులి పురుగుల్ని పోగొడుతుంది. కుష్ఠు, బొల్లి, దప్పికలను నివారిస్తుంది. ఆకుల్ని కళ్లపై పెట్టుకుంటే నేత్ర దోషాలు తొలుగుతాయని, శిరస్సుపై పెట్టుకుంటే తలనొప్పి తగ్గుతుందనే విశ్వాసం కూడా ఉంది.

బృహతీపత్రం ఈ పత్రిని నేల మునగ అని కూడా అంటారు. ఈ పత్రి జ్వరం, జలుబు, దగ్గు, కఫము వంటి వాటికి ఔషధంగా పని చేస్తుంది. శ్వాస దోషాలని, హృదయ దోషాల్ని, మలబద్దకాన్ని నివారిస్తుంది.

బిల్వపత్రం ఈ ఆకుకు మారేడు దళమని కూడా పేరు ఉంది. ఇది దుర్వాసనను నివారిస్తుంది.

దుర్వాయుగ్మం గరికనే ఈ పేరుతో పిలుస్తారు. ముక్కు వెంట కారే రక్తాన్ని నివారిస్తుంది. సర్పికి, రక్త పైత్యానికీ, మూత్ర బంధానికీ ఔషధంగా భావిస్తారు.

దత్తూరపత్రం దత్తూరపత్రం అంటే ఉమ్మెత్త ఆకు. ఉమ్మెత్త రసాన్ని తలకు మర్దన చేస్తే ఊడిపోయిన వెంట్రుకలు మొలుస్తాయి. జుట్టు రాలడం నివారింపబడుతుంది. మానసిక రోగాలను తగ్గించటానికి కూడా దీనిని ఉపయోగిస్తారు.

బదరీపత్రం రేగు ఆకును ఈ పేరుతొ పిలుస్తారు. ఇది ఎముకలకు బలాన్నిస్తుంది. ఇది బాల రోగాలను నయం చేస్తుంది.

అపామార్గం ఉత్తరేణి ఆకును ఈ పేరుతొ పిలుస్తారు. చర్మ రోగాలు నయం చేయటానికి ఇది ఉపయోగపడుతుంది.

తులసీపత్రం ఈ ఆకు శ్లేష్మాన్ని హరిస్తుంది. క్రిముల్ని నశింపజేస్తుంది. దగ్గును, వాంతులను తగ్గిస్తుంది. మూత్రబంధాన్ని అరికడుతుంది.

చూతపత్రం అంటే మామిడి ఆకు. లేత ఆకులను పెరుగుతో కలిపి తింటే అతిసారం తగ్గటానికి ఉపయోగపడుతుంది. మామిడి జీడి, పసుపు కలిపి రాస్తే కాళ్ళ ఒరుపులు తగ్గుతాయి. మామిడి ఆకు తోరణాలు వాతావరణ కాలుష్యాన్ని తగ్గిస్తాయి.

కరవీరపత్రం అంటే గన్నేరు ఆకు. ఇది కుష్ఠు రోగుల దురదలు పోగొడుతుంది.

విష్ణుకాంత పత్రం ఇది కఫం, వాతం, వ్రణాలు మరియు క్రిములను హరిస్తుంది.

దాడిమీపత్రం అంటే దానిమ్మ ఆకు. ఇది వాతాన్ని, పిత్తాన్ని, కఫాన్ని హరించి హృదయానికి బలాన్ని చేకూర్చుతుంది.

దేవదారుపత్రం దేవదారు తైలం వాపులను హరిస్తుంది. ఎక్కిళ్ళను, చర్మరోగాలు తగ్గించే గుణాలు ఈ ఆకులకు ఉన్నాయి. 

మరువకపత్రం ఈ ఆకులు వాత, శ్లేష్మాదులను హరిస్తాయి. శ్వాస నాళాలకు సంబంధించిన రుగ్మతలను, హృద్రోగాలను తగ్గిస్తాయి. తేలు, జెఱ్ఱి వంటి పురుగుల విషాన్ని కూడా హరిస్తాయి. 

సింధూరపత్రం దీనిని వావిలి ఆకుగా కూడా పిలుస్తారు. వీటిని పురిటి స్నానానికి వాడతారు. ఆకుల కాషాయం శూలి, గ్రహణి మొదలగు వ్యాధుల క్రిములను నశింపచేస్తుంది. దీనిని ముద్దగా చేసి నుదుట పట్టీ వేస్తే తలపోటు తగ్గుతుంది. 

జాజిపత్రం ఇది వేడి చేస్తుంది. శరీరానికి తేజస్సునిస్తుంది. జఠదీప్తిని కలిగిస్తుంది. కంఠస్వరాన్ని బాగు చేస్తుంది. దగ్గును తగ్గిస్తుంది. నోటి దుర్వాసనను పోగొడుతుంది. 

గండకీపత్రం దీనిని తీగగరిక అని కూడా పిలుస్తారు. దీని రసం అపస్మారక స్థితిని, పైత్య వికారాన్ని మూర్ఛలను తగ్గిస్తుంది. నులి పురుగుల్ని, వాటి వలన వచ్చే వ్యాధులను కూడా నివారిస్తుంది. 

శమీపత్రం అంటే జమ్మి ఆకు. ఇది మూల వ్యాధిని నివారిస్తుంది. అతిసారం, కుష్టు, రక్తస్రావాలను ఉపశమింపచేస్తుంది. వెంట్రుకలు నల్లగా ఉండటానికి దోహదపడుతుంది. దీని గింజల చూర్ణం పాలతో కలిపి తాగితే వీర్య వృద్ధి అవుతుంది. 

అశ్వత్థపత్రం అంటే రావి ఆకు. ఇది గర్భస్థ దోషాలను నివారిస్తుంది. 

అర్జునపత్రం అంటే మద్ధి ఆకు. వాత రోగాలను, కఫ రోగాలను నివారిస్తుంది. వ్రణాలను తగ్గించడానికి ఉపయోగపడుతుంది. 

అర్కపత్రం  దీనిని జిల్లేడు ఆకు అని కూడా అంటారు. వీటి వలన శిరో దోషాలు, విషాదోషాలు పోతాయి. 64 వ్యాధుల చికిత్సకు ఇవి ఉపయోగపడతాయనే వాదన ఉంది.              

గజ్వేల్‌లో విజయం సాధించటంతో కెసిఆర్ ఎనిమిదవసారి ఎంఎల్యేగా ఎన్నికయ్యారు. ఆయన ఐదు సార్లు ఎంపీగా కూడా గెలిచారు. తెలంగాణ కోసం తరచుగా రాజీనామా చేసి గెలుపొందడంతో స్వల్ప కాలంలోనే ఆయన ఈ ఘనత సాధించారు. ఇంతకు ముందు బాగారెడ్డి గారికి ఏడు సార్లు అసెంబ్లీకి ఎన్నికయిన రికార్డు ఉంది. ఎనిమిది సార్లతో కెసిఆర్ ఇప్పుడు దీనిని అధిగమించారు. జానా రెడ్డి గారు కూడా ఇప్పటికే ఏడు సార్లు ఎన్నికయినప్పటికీ ఈసారి ఓటమి పాలయ్యారు.   

హరీష్ రావు గారు సిద్ధిపేట నియోజకవర్గం నుండి ఆరవ సారి ఎంఎల్యేగా గెలుపొందారు. లక్షా పద్దెనిమిది వేల మెజారిటీ రావటం తెలుగు రాష్ట్రాల చరిత్రలో ఒక రికార్డు. అంతే కాకుండా ఆయన దేశంలో చిన్న వయసులోనే (47) ఆరు సార్లు ఎంఎల్యేగా ఎన్నికైన ఘనతను సాధించారు.          

ఎన్నికల సమరంలో టిఆర్ఎస్ పార్టీ ఓట్ల సునామీని సృష్టించింది. పోలైన ఓట్లలో 46.9%తో, కోటి ఓట్లకు చేరువలో నిలిచింది. విజయం సాధించిన వారిలో హరీష్ రావుకు ఏకంగా లక్షా పద్దెనిమిది వేల మెజారిటీ వచ్చింది. ఈయనతో పాటు మరో పద్నాలుగు మంది టిఆర్ఎస్ అభ్యర్థులకు కూడా యాభయి వేలకు పైగా ఆధిక్యత లభించింది. వీరిలో ఆరూరి రమేష్ (వర్ధన్నపేట - 99,240), కెటిఆర్ (సిరిసిల్ల - 89,009), మల్లారెడ్డి (మేడ్చల్ - 87,990), కెసిఆర్, మైనంపల్లి లాంటి వారు ఉన్నారు. వీరితో పాటు ఇద్దరు ఎంఐఎం అభ్యర్థులు కూడా 50వేలకు పైగా మెజారిటీ సాధించారు. 

సాధారణంగా అసెంబ్లీ ఎన్నికలలో 50వేలకు పైగా మెజారిటీ అంటే సామాన్యమైన విషయమేమీ కాదు. ఇంతమంది అభ్యర్థులు ఈ స్థాయి మెజారిటీ సాధించటం ఉమ్మడి రాష్ట్ర చరిత్రలో కూడా ఎప్పుడూ జరగలేదు. కెసిఆర్ ఎన్నికల వ్యూహాలు, సంక్షేమపథకాలు మరియు  ప్రతిపక్షాల అనైతిక పొత్తు ఈ స్థాయి మెజారిటీలు సాధించటానికి దోహదపడ్డాయి.              

రాష్ట్రమంతటా విజయం సాధించిన టిఆర్ఎస్ పార్టీకి ఉమ్మడి ఖమ్మం జిల్లాలో మాత్రం ఎదురుదెబ్బ తగిలింది. ఇక్కడ మొత్తం పది అసెంబ్లీ స్థానాలుండగా కాంగ్రెస్ పార్టీ ఆరు, టిడిపి రెండు, స్వతంత్య్ర అభ్యర్థికి ఒక స్థానం లభించాయి. టిఆర్ఎస్ కేవలం ఒక స్థానంతో సరిపెట్టుకోవలసి వచ్చింది. స్వయంగా మంత్రి తుమ్మల నాగేశ్వరరావుతో పాటు 2014లో గెలిచిన ఏకైక స్థానం కొత్తగూడెంలో కూడా పార్టీ ఓడిపోయింది. ఒక్క ఖమ్మం నియోజక వర్గం నుండి మాత్రం పువ్వాడ అజయ్ విజయం సాధించారు.  

తెలంగాణలోని మిగతా ప్రాంతాలలో పోలిస్తే ఖమ్మం జిల్లా పరిస్థితి కొంతవరకు భిన్నమైనది. ఇక్కడ తెలంగాణ ఉద్యమ ప్రభావం తక్కువ. ప్రజా కూటమిలోని పార్టీల పొత్తును జిల్లా ప్రజలు ఆమోదించారు. కాంగ్రెస్, సిపిఐ టిడిపిల ఓట్లు ఒక పార్టీనుండి మరో పార్టీకి బదిలీ అయ్యాయి. టిఆర్ఎస్ పార్టీలోని అంతర్గత పోరు కూడా కలిసి రావటంతో, రాష్ట్రమంతటా ఎదురు గాలులు వీచినా ఖమ్మంలో మాత్రం పదింట ఎనిమిది నియోజకవర్గాలను కూటమి గెలవగలిగింది.  

ఎన్నికల ఫలితాలను పరిశీలిస్తే తెలంగాణ ప్రజలను తెలుగు మీడియా ఏమాత్రం ప్రభావితం చేయలేకపోతుందనే విషయం అవగతమవుతుంది. వీటి అంచనాలు, విశ్లేషణలు గురి తప్పగా, జాతీయ మీడియా సంస్థల ఎగ్జిట్ పోల్స్, విశ్లేషణలు మాత్రం వాస్తవానికి దగ్గరగా ఉన్నాయి.   

గత  కొన్ని రోజులుగా తెలుగు మీడియాలో తెలంగాణ ఎన్నికలలో మహాకూటమి గణనీయమైన ఫలితాలు సాధించనుందనే విశ్లేషణలు కనిపించాయి. ప్రసారం చేసిన వార్తలు అన్నీ కాంగ్రెస్ నేతృత్వంలోని కూటమికి అనుకూలంగా ఉన్నాయి. అంతేకాకుండా చివరిలో లగడపాటి రాజగోపాల్ సర్వే కూడా ఇలాంటి టిడిపి తరహా ఎత్తుగడలకు పరాకాష్ఠగా నిలిచింది. వీటికితోడు ఎన్నికల తరువాత కూడా హంగ్ ఏర్పడనుందని కూడా మీడియా సంస్థలే తేల్చి చెప్పాయి. ఇవన్నీ ఒక విధంగా తెలంగాణ ప్రజలను ప్రభావితం చేసేందుకనే విషయం స్పష్టం అవుతుంది. కానీ, తెలంగాణ ఉద్యమ సమయంలో తెలుగు మీడియా సంస్థల పాత్ర వలన ఇవన్నీ దాదాపుగా ప్రజల విశ్వాసం కోల్పోయాయి. దానితో వారు తమ భావాలను పంచుకోవటానికి కూడా సంకోచిస్తున్నారు. జాతీయ మీడియాతో ఇక్కడి ప్రజలకు ఆ సమస్య లేనందువలన వాటి విశ్లేషణలు అంచనాలను అందుకున్నాయి.

ప్రవాస భారతీయులు పంపే నగదు 80 బిలియన్ డాలర్లకు చేరనుండటంతో, ఈ సంవత్సరం కూడా మన దేశం ఈ విషయంలో అగ్రస్థానాన్ని నిలబెట్టుకోనుందని ప్రపంచ బ్యాంకు నివేదిక తెలియచేసింది. తరువాత స్థానాలలో చైనా (67 బిలియన్ డాలర్లు), మెక్సికో, ఫిలిప్పీన్స్ (రెండు దేశాలు సమానంగా 34 బిలియన్ డాలర్లు), ఈజిప్టు (26 బిలియన్ డాలర్లు) ఉన్నాయి. 

మన దేశానికి ప్రవాస నిధుల ప్రవాహంలో గత మూడు సంవత్సరాలుగా చెప్పుకోదగ్గ వృద్ధి కనిపిస్తోంది. 2016లో 62.7 బిలియన్ డాలర్లు ఉండగా, 2017 నాటికి 65.3 బిలియన్ డాలర్లకు చేరాయి. గత సంవత్సరం ఇది మన జీడీపీలో 2.7 శాతం. మన దేశ ద్రవ్యలోటును పూడ్చుకోవటానికి ఈ నిధులు ఎంతగానో దోహదపడుతున్నాయి. మన దేశానికి గల్ఫ్ దేశాలనుండి వచ్చే మొత్తం, యురోపియన్, అమెరికాల నుండి వచ్చే మొత్తాల కన్నా ఎక్కువగా ఉండటం విశేషం.           

ఈ యేడు అభివృద్ధి చెందుతున్న దేశాలకు జరుగుతున్న చెల్లింపులు 10.8% పెరిగి 528 బిలియన్ డాలర్లకు చేరనున్నాయి. 2017లో ఇవి 7.8% వృద్ధి చెందాయి. దక్షిణ ఆసియాకు వస్తున్న నగదు 2018లో 13.5% పెరిగి 132 బిలియన్ డాలర్లకు చేరనుంది. 2017లో వృద్ధి 5.7% మాత్రమే. చమురు ధరలు పెరిగి గల్ఫ్ దేశాల ఆర్ధిక పరిస్థితులు మెరుగవటంతో  గత మూడు సంవత్సరాలుగా దక్షిణాసియాలో ఈ పెరుగుదల కనిపిస్తోంది. బంగ్లాదేశ్ లో వృద్ధి ఈ సంవత్సరం 17.9% ఉండగా, పాకిస్తాన్ విషయంలో 6.2% ఉంది. మూడు సంవత్సరాల క్రితం వరకు పాకిస్తాన్ కు వచ్చే నిధులు కొన్ని సంవత్సరాల పాటు వరుసగా తగ్గాయి.

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget