Telugu News

Latest Post

ఇవెక్కడి నిబంధనలు
అమెరికాలో పనిచేసే విదేశీయులు ఎవరైనా సరే పది సంవత్సరాల కాలంపాటు సోషల్ సెక్యూరిటీ కాంట్రిబ్యూషన్ చెల్లిస్తేనే ఆ ప్రయోజనాలు పొందటానికి అర్హులు. ఇది అమెరికాలో సామాజిక ప్రయోజనాలు పొందటానికి ఆ దేశం విధించిన నిబంధన. ఉద్యోగం చేసే ప్రతి ఒక్కరూ అక్కడ విధిగా సోషల్ సెక్యూరిటీ కాంట్రిబ్యూషన్ చెల్లిస్తారు. 

ఇక ఇంకో నిబంధన విషయానికి వస్తే హెచ్‌-1బీ, ఎల్‌-1 వీసాలపై అమెరికాలో పనిచేసే విదేశీయులు, గరిష్టంగా 7 సంవత్సరాలకు మించి ఆ దేశంలో ఉండటానికి వీల్లేదు. ఎక్కడో తేడా కొడుతోంది కదా.. అవును ఈ రెండు నిబంధనలు పరస్పర విరుద్ధంగా ఉన్నాయి. 

విదేశీయులు అక్కడ 7 సంవత్సరాల పాటు పనిచేసి అక్కడి ప్రభుత్వానికి, తమకు ఏ మాత్రం ఉపయోగం లేని సోషల్ సెక్యూరిటీ కాంట్రిబ్యూషన్ ను చెల్లిస్తున్నారు. ఒక్క భారతీయులే ఈ విధంగా నష్టపోయిన మొత్తం బిలియన్ల డాలర్లు ఉంటుందట. ఈ విషయాన్ని కేంద్ర వాణిజ్య శాఖా సహాయమంత్రి సీఆర్‌ చౌధరి, వైసిపి ఎంపీ విజయసాయి రెడ్డి అడిగిన ప్రశ్నకు సమాధానంగా చెప్పుకొచ్చారు. 

మాట మార్చిన రాష్ట్రపతి
రాష్ట్రపతి రామ్‌నాథ్‌ కోవింద్‌ ఒకప్పుడు తాను అన్న మాటలను అవసరార్థం మర్చిపోయారు.  మన దేశంలో రాష్ట్రపతి పదవి కూడా రాజకీయ అవసరాలకు అతీతం కాదని మరోసారి విజయవంతంగా నిరూపించేసారు. 

భారత రాజ్యాంగంలోని 80(1)(a) వ అధికరణం ప్రకారం రాష్ట్రపతి తన పదవీకాలంలో సాహిత్యం, శాస్త్ర విజ్ఞానం, కళలు, సామాజిక సేవా రంగాలకు చెందిన 12 మంది ప్రముఖులను నేరుగా రాజ్యసభకు నామినేట్‌ చేయవచ్చు. అలాంటి నామినేషన్ సీట్లు ఇప్పుడు నాలుగు ఖాళీ కావటంతో నలుగురిని నామినేట్ చేసారు. వారు వరుసగా రామ్‌ షాకల్, రాకేష్‌ సిన్హా, రఘునాథ్‌ మహాపాత్ర, సోనాల్‌ మాన్‌సింగ్‌లు. వీరిలో రామ్‌ షాకల్ కు రాజకీయ నేపథ్యం, రాకేష్ సిన్హాకు RSS నేపథ్యం ఉన్నాయి. 

సంప్రదాయం ప్రకారం ఈ పదవులకు రాజకీయ నేపథ్యం ఉన్నవారిని నామినేట్ చేయకూడదు. రాష్ట్రపతి ఇలా ఈ నిబంధనను ఉల్లంఘించటం ఇదేమీ తొలిసారి కాదు. 2016 లో కూడా సిద్ధూ, సుబ్రహ్మణ్య స్వామిలు ఇలాగే నియమితులయ్యారు. 

కాగా 2009లో బీజేపీ అధికార ప్రతినిధిగా ఇదే రామ్‌నాథ్‌ కోవింద్‌ ఉన్నప్పుడు, మన్మోహన్‌ సింగ్‌ ప్రభుత్వం రాజ్యసభకు మణిశంకర్‌ అయ్యర్‌ ను నామినేట్ చేసింది. ఆయన సాహితీ వేత్త అయినప్పటికీ, కాంగ్రెస్‌ నాయకుడు కావటంతో కోవింద్ అప్పుడు ఆ నామినేషన్ ను తీవ్రంగా వ్యతిరేకించారు. కానీ ఇప్పుడు ఆయనే అంతకు మించిన సాంప్రదాయ ఉల్లంఘనలు చేస్తున్నారు. అదే రాజకీయమంటే, ప్రతిపక్షంలో ఉంటేనే ఎక్కడలేని విలువలు గుర్తొస్తాయి. 

ఇది టీడీపీకి విజయమే అయినా....
అవిశ్వాస తీర్మానం.... పార్లమెంట్లో బడ్జెట్ సమావేశాలప్పటి నుండి రోజూ వింటున్న పదం.  బడ్జెట్ సమావేశాలప్పుడు టిడిపి, వైసిపిలు దాదాపుగా ప్రతి రోజూ స్పీకర్ కు అవిశ్వాస తీర్మానాలు అందజేసాయి. కానీ అన్నాడీఎంకే సభ్యుల గొడవ మూలంగా చర్చ చేపట్టలేదు. బిజెపి ఆ సమయంలో అవిశ్వాసాన్ని ఎదుర్కొనడం ఇష్టం లేక  అన్నాడీఎంకేను అడ్డుపెట్టుకుని అప్పటికి ఈ సమస్యను వాయిదా వేసింది. ఇప్పుడు వర్షాకాల సమావేశాల మొదటి రోజునే అవిశ్వాస తీర్మానం కోసం అందిన నోటీసును ఆమోదించి 20వ తేదీన చర్చను చేపట్టనుంది. అంటే ఈసారి ప్రత్యేక హోదా పై జరిగే చర్చకు అధికార బిజెపి ముందే సన్నద్ధమై ఉన్నదనే భావించాలి. 

ప్రత్యేక హోదా విషయంపై వైసిపి ఎంపీలు రాజీనామా చేయటంతో, కేంద్ర ప్రభుత్వం పై అవిశ్వాసం పెట్టడం టిడిపి సాధించిన విజయంగానే పేర్కొనవచ్చు. దీని ద్వారా టిడిపికి కేంద్ర ప్రభుత్వాన్ని ప్రత్యేక హోదాపై విమర్శించే, వారినుండి అధికారికంగా సమాధానం రాబట్టే అవకాశం వచ్చింది. తెలుగు దేశం పార్టీ ఎంత వరకు దీనిని ఉపయోగించుకోగలదో చూడాలి. 

ఈ చర్చలో వెంకయ్య నాయుడు, బిజెపి మేనిఫెస్టో, మోడీ తిరుపతి వాగ్దానం మరియు చంద్రబాబు ప్యాకేజీ /హోదా  మాట మార్చటాలు ప్రతీది చర్చకొచ్చే అవకాశం ఉంది. చంద్రబాబు, కేంద్రానికి ప్యాకేజీ గురించి గానీ, హోదా గురించి గానీ అప్పట్లో ఏమైనా అధికారికంగా స్పందించి ఉంటే మాత్రం ఆయన ఇబ్బందుల్లో పడే అవకాశం ఉంది. కాంగ్రెస్ కు ఈ చర్చ లాభించే అవకాశం ఉంది. ఏమాత్రం అవకాశం వచ్చినా అది ఈ రెండు పార్టీలను ఎండగట్టే అవకాశం ఉంది. 

వైఎస్ఆర్ కాంగ్రెస్ కు మాత్రం ఇది కోల్పోయిన సువర్ణావకాశమే. ఇప్పటికే ఈ పార్టీ ఎంపీలు రాజీనామా చేయటంతో బిజెపి, టిడిపి కుమ్మక్కయ్యాయి, లేకపోతే కాంగ్రెస్ టిడిపి కుమ్మక్కయ్యాయి అని ఆరోపించటం మినహా చేయగలిగింది ఏమీ లేదు. 

ఏది ఏమైనా రాజకీయ పార్టీల లాభ నష్టాలను వదిలేస్తే ఆంధ్రప్రదేశ్ ప్రజలకు మాత్రం ఇది సంతోషకరమైన విషయమే. హోదాపై ఎవరేం మాట్లాడతారో, ఎవరి ఉద్దేశ్యాలేమిటో స్పష్టంగా బహిర్గతమయ్యే అవకాశం ఉంది.  

అవిశ్వాసానికి ఎంఐఎం మద్ధతు, స్పందించని టిఆర్ఎస్
అనుకున్న విధంగానే ఇవాళ టిడిపి ఎంపీ కేశినేని నాని ప్రవేశపెట్టిన అవిశ్వాస తీర్మానానికి స్పీకర్ సుమిత్రా మహాజన్ ఆమోదం తెలిపారు.  టిడిపి ఎంపీలతో పాటు కాంగ్రెస్ నుండి కూడా అవిశ్వాస తీర్మానం నోటీసులు అందాయి. ఈ సందర్భంగా తీర్మానాన్ని సమర్థించేవారు లేచి నిలబడాలని స్పీకర్ కోరగా టిడిపి, కాంగ్రెస్ ఎంపీలతో పాటు సీపీఐ, సీపీఎం, ఆర్ఎస్పీ, ఆమ్ ఆద్మీ, సమాజ్ వాదీ, ఎన్సీపీ, టీఎంసీ, మరియు ఆర్జేడీ పార్టీల  ఎంపీలు లేచి నిలబడ్డారు. ఎంఐఎం సభ్యుడు అసదుద్దీన్ ఒవైసీ కూడా లేచి నిలబడ్డారు. కానీ టిఆర్ఎస్ పార్టీ ఎంపీలు స్పందించలేదు. 

యాభయ్ మందికి పైగా సభ్యులు మద్ధతు తెలిపారని, త్వరలో చర్చ తేదీని నిర్ణయిస్తానని స్పీకర్ తెలుపగా, 10 రోజుల నిబంధనను టీఎంసీ సభ్యుడు సౌగత్ రాయ్ ప్రస్తావించారు. అతిపెద్ద ప్రతిపక్షం అయిన కాంగ్రెస్ ప్రవేశపెట్టిన అవిశ్వాస తీర్మానాన్ని పక్కన బెట్టి టిడిపి ప్రతిపాదించిన అవిశ్వాసాన్ని ఆమోదించినందుకు అభ్యంతరం తెలిపారు. ముందుగా ఇచ్చిన నోటీసు పై స్పందించామని స్పీకర్ తెలిపారు. 

టిఆర్ఎస్ ఎంపీలు మాట్లాడుతూ కెసిఆర్ నుండి ఆదేశాలు అందిన తర్వాత  అవిశ్వాసం విషయంలో ఆలోచిస్తామని తెలిపారు. కాగా ఇప్పటికే వైఎస్ఆర్ కాంగ్రెస్ పార్టీ ఎంపీల రాజీనామాలు ఆమోదం పొందటంతో అవిశ్వాసం పై జరిగే చర్చలో ప్రత్యేక హోదాపై మాట్లాడే మంచి అవకాశాన్ని కోల్పోయినట్లయింది.

ప్రముఖ తమిళ టెలివిజన్ నటి ప్రియాంక ఆత్మహత్య చేసుకున్నారు. వంశం సీరియల్ లో రమ్యకృష్ణ సరసన చేసిన జోతిక పాత్ర ఆమెకు ఎంతో పేరు తెచ్చిపెట్టింది. ఆమె కొన్ని తమిళ చిత్రాలలోనూ కనిపించింది. ఆమె తెల్లవారుఝామున వ‌ల‌స‌ర‌వ‌క్కంలోని తన ఇంట్లో సీలింగ్‌కు వురి వేసుకుంది. ఉదయం పనిమనిషి వచ్చి చూసిన వెంటనే పోలీసులకు రిపోర్టు చేసింది. వారు కేసు ఫైల్ చేసుకుని దర్యాప్తు చేస్తున్నారు. 

కుటుంబ కలహాలతోనే ప్రియాంక ఈ పని చేసి ఉంటుందని భావిస్తున్నారు. మూడు సంవత్సరాల క్రితం ఆమెకు అరుణ్ బాల అనే వ్యక్తితో వివాహమైంది. మనస్పర్థల కారణంగా గత మూడు నెలల నుండి వారు వేరుగా ఉంటున్నారు. ఈ జంటకు ఇంకా పిల్లలు లేరు. 

రాష్ట్ర విభజన జరిగినప్పుడు పార్లమెంట్ సాక్షిగా ఆంధ్రప్రదేశ్ రాష్ట్రానికి ఐదు సంవత్సరాల పాటు ప్రత్యేక హోదాను ఇస్తామని అప్పటి ప్రధానమంత్రి హామీ ఇచ్చారు. కానీ అది వాస్తవ రూపం దాల్చలేదు. ఇప్పుడు అధికారం లో ఉన్న బిజెపి అయితే ఏకంగా ఐదు కాదు, పది సంవత్సరాల పాటు ప్రత్యేక హోదా కావాలని పార్లమెంట్లో నినదించింది. వారి ఎన్నికల మానిఫెస్టోలో కూడా ఈ అంశాన్ని చేర్చారు. కానీ వీరు కూడా హోదాను ఇవ్వలేదు. 

బిజెపి ప్రత్యేక హోదా ఇవ్వకపోవటానికి ఉన్న కారణాలను విశ్లేషిస్తే

1. నరేంద్ర మోడీ ప్రధానమంత్రి అయిన తర్వాత వారికి ఆంధ్రప్రదేశ్ కు ప్రత్యేక హోదా ఇవ్వటంలో ఎటువంటి రాజకీయ ప్రయోజనం కనిపించకపోవడం. రాష్ట్రంలో బిజెపి రాజకీయంగా బలంగా లేకపోవటంతో, ఒకవేళ ప్రత్యేక హోదా ఇచ్చినా తెలుగు దేశం పార్టీ తమ ఘనతగా ప్రచారం చేసుకుంటుంది తప్ప బిజెపికి ప్రయోజనం ఉండే అవకాశం లేదు.

2. ప్రత్యేక హోదా విషయంలో బీహార్, బెంగాల్ సహా ఎన్నో రాష్ట్రాల నుండి డిమాండ్లు ఉన్నాయి. ఒక రాష్ట్రానికి ఇస్తే అనవసరంగా హోదా తేనెతుట్టెను కదిలించినట్లవుతుంది. హోదా విషయంలో ఇప్పటివరకు కొన్ని నిబంధనలు పాటిస్తూ వస్తున్నారు. సరిహద్దు లో ఉండటం, పర్వత ప్రాంతాన్ని కలిగి ఉండటం లాంటివి. వీటిని సడలించి ఆంధ్రప్రదేశ్ కు హోదా కల్పిస్తే అన్ని రాష్ట్రాలు అప్పుడు హోదాను  డిమాండ్ చేసే అర్హతను కలిగి ఉంటాయి. 

3. పొరుగు రాష్ట్రాల నుండి వ్యక్తమవుతున్న వ్యతిరేకత. ఒకవేళ ఆంద్రప్రదేశ్ కు ప్రత్యేక హోదా ఇస్తే తమ రాష్ట్రానికి రావలసిన ప్రాజెక్టులు అక్కడికి వెళ్తాయని భయం. ఈ విషయంలో తమిళనాడు బాహాటంగా ఆంధ్రప్రదేశ్ కు ప్రత్యేక హోదాను వ్యతిరేకించింది. కర్ణాటక ఆంధ్ర ప్రదేశ్ కు ఇస్తే తమకూ కావాలని డిమాండ్ చేసింది. ఛత్తీస్ గఢ్, ఒడిషా తమకు కూడా కావాలని అడుగుతున్నాయి.  అయితే తెలంగాణ మాత్రం హోదాకు మద్దతు తెలిపింది. 

ఈ తెలంగాణ మద్ధతు ఎంతవరకు అని విశ్లేషిస్తే 

ఆంధ్రప్రదేశ్ కు ప్రత్యేక హోదా వస్తే తెలంగాణకు ఏమైనా ప్రయోజనం ఉంటుందా? అంటే మిగిలిన పొరుగు రాష్ట్రాల తరహాలో నష్టం తప్ప లాభం ఏమీ ఉండదు. కానీ ప్రస్తుతం ఉన్న పరిస్థితులలో ప్రత్యేక హోదా వచ్చే అవకాశం లేదు కనుక మాట వరుసకు మద్దతు  ఇచ్చేసారు. నిజంగా ఇచ్చే సమయం వస్తే వారు తమకు కూడా హోదా కావాలనటం గానీ, వ్యతిరేకించటం గానీ చేస్తారు. మీకు గుర్తుండే ఉంటుంది. ఆంధ్రప్రదేశ్ లోని రాజకీయ నాయకులు ప్రత్యేక తెలంగాణ విషయంలో కూడా ఇలానే చేసారు. చేసుకున్నవారికి చేసుకున్నంత. 

అయితే అసలు ఇచ్చే ఉద్దేశ్యం లేనప్పుడు బిజెపి ఇస్తామని ఎన్నికల మానిఫెస్టోలో ఎందుకు పెట్టాలి. ఎందుకు హామీ ఇవ్వాలి. ఇప్పటి రాజకీయ పార్టీలకు, నాయకులకు అధికారమే పరమావధి. దాన్ని సాధించేందుకు ఎన్ని హామీలైనా ఇస్తారు. ఏమైనా చేస్తామంటారు. ఒకరకంగా హోదా రాకపోవటం కన్నా అందరూ మనల్ని మోసం చేసారు, చేస్తున్నారన్న విషయమే ఎక్కువ బాధ పెడుతుంది. 

ఇప్పుడు హోదా ఎలా సాధించాలి అనేదాని కన్నా, ఇవ్వకపోవటం అనే నేరాన్ని ఎలా ఎదుటివారి పైన తోసేయాలన్న దానిపైనే రాజకీయం నడుస్తోంది. చంద్రబాబు నాయుడు గారు ఈ సారి ప్రత్యేక హోదా సాధ్యంకాదని గ్రహించి ప్యాకేజీకి ఒప్పుకున్నారు. కానీ ప్రజల్లో వ్యతిరేకతను గమనించి మళ్ళీ హోదా రాగం ఎత్తుకుని బిజెపిని దుమ్మెత్తి పోయటం ప్రారంభించారు. ఇక బిజెపి, ముఖ్యమంత్రి గారిని ఊగిసలాట ధోరణిలో పెట్టి   నేరం ఆయన పైకి తోసే ప్రయత్నం చేసింది. ఇక ప్రతిపక్షం విషయానికి వస్తే తాము అధికారంలోకి వస్తే హోదా వస్తుందంటారు. ఎలా వస్తుందో వారికే తెలియదు. కాంగ్రెస్ కూడా అంతే. రాజకీయ పార్టీలన్నీ 'ఎప్పటికెయ్యది ప్రస్తుత మప్పటికా మాటలాడి' తరహాలో తమ అవసరాల్ని తీర్చుకుంటాయి. 

కొందరు నేను ప్రకటిస్తున్న క్యాస్టింగ్ కౌచ్ ఆరోపణల లిస్టు చాలా పెద్దగా ఉందని భావిస్తున్నారు. కానీ అది అది తప్పు. ఎందుకంటే పెద్ద హీరోయిన్లయిన త్రి.., నయ...., కా......, స.... లాంటి వారు బయటపడి తమ లిస్టు చెపితే అది విని మీరు చచ్చిపోతారు. అని ఫేస్ బుక్ లో పోస్ట్ చేసింది.

హఫీజ్ సయీద్ ఎన్నికలలో... షరీఫ్ జైలులో
పాకిస్తాన్లో ఎన్నికలకు ముందు చోటు చేసుకుంటున్న పరిణామాలు, ఆ దేశం ఉగ్రవాదులకు మద్ధతునిచ్చే స్వభావాన్ని, దేశ పరిపాలన మరియు రాజకీయాలలో అక్కడి సైన్యం జోక్యాన్ని ప్రపంచానికి బహిర్గతం చేస్తున్నాయి. 

ముంబయి బాంబు పేలుళ్ల కేసులో ప్రధాన నిందితుడు, లష్కర్-ఏ-తోయిబా అధినేత హఫీజ్ సయీద్ ఎన్నికలలో ఉత్సాహంగా ప్రచారం చేస్తుండగా, మాజీ ప్రధాని నవాజ్ షరీఫ్ జైలులో ఊచలు లెక్కబెడుతున్నారు. 

అమెరికా హఫీజ్ సయీద్ తలపై 10 మిలియన్ డాలర్ల పారితోషికం ప్రకటించింది. ఈ ఎన్నికలలో అతను స్వయంగా పోటీ చేయడం లేదు కానీ అతని పార్టీ తరపున 265 మంది అభ్యర్థులను నిలబెట్టాడు. అభ్యర్థులలో అతని కుమారుడు, అల్లుడు కూడా ఉన్నారు. అతని పార్టీ మిల్లి ముస్లిం లీగ్ కు అనుమతి లభించక పోవటంతో ఇప్పటికే అనుమతి పొంది, పెద్దగా పేరులేని అల్లా-హు-అక్బర్ తెహ్రీక్ పార్టీని పోటీకి ఎంచుకున్నాడు. 

ఇక నవాజ్ షరీఫ్ విషయానికి వస్తే ప్రధాన మంత్రిగా అతను స్వంత నిర్ణయాలు తీసుకుంటూ సైన్యానికి కంటగింపుగా మారాడు. ఆయన ఆర్ధిక సరళీకరణ, ఇస్లామిక్ తీవ్రవాదం వంటి విషయాలలో సైన్యానికి వ్యతిరేకంగా కఠిన నిర్ణయాలు తీసుకున్నాడు. భారత్ తో సంబంధాల విషయంలో కూడా షరీఫ్ నిర్ణయాలు సైన్యానికి నచ్చలేదు. దీనితో సంవత్సరాల క్రితం నాటి కేసులో సరిగ్గా ఎన్నికల ముందే తీర్పు వచ్చి అతనికి శిక్ష పడింది. ఈ తీర్పు వల్ల దేశంలో అత్యంత ప్రజాదరణ ఉన్న నేత ఎన్నికలలో పాల్గొనకుండా నిషేధానికి గురయ్యారు. కాగా సైన్యం ఇప్పుడు మాజీ క్రికెటర్ ఇమ్రాన్ ఖాన్ నేతృత్వంలోని తెహ్రీక్-ఏ-ఇన్సాఫ్ పార్టీకి మద్ధతు ఇస్తున్నట్లు వార్తలు వస్తున్నాయి. 

అమెరికా కూడా పాకిస్తాన్లో జరుగుతున్న పరిణామాల పట్ల ఆందోళన వ్యక్తం చేసింది. ఐక్య రాజ్య సమితి రూపొందించిన ఉగ్రవాదుల జాబితాలో పాకిస్తాన్ కు చెందిన వారే అత్యధికంగా 139 మంది ఉన్నారు. ఈ ఎన్నికల ద్వారా పాకిస్తాన్ ఉగ్రవాదులను నాయకులుగా మారిస్తే తీవ్ర చర్యలు తీసుకుంటామని హెచ్చరించింది. 

కాంగ్రెస్ తరపున అవిశ్వాస తీర్మానం
ఎఐసిసి ప్రధాన కార్యదర్శి, ఆంధ్రప్రదేశ్ రాష్ట్ర కాంగ్రెస్ పార్టీ ఇన్ఛార్జి ఊమెన్ చాందీ  మాట్లాడుతూ పార్లమెంటు సమావేశాల్లో ప్రత్యేక కేటగిరీ హోదా (ఎస్సిఎస్) కోసం కాంగ్రెస్ పార్టీ తరపున  అవిశ్వాస తీర్మానం ప్రవేశపెట్టనున్నట్లు ప్రకటించారు. వచ్చే 2019 ఎన్నికలలో ఒకవేళ కాంగ్రెస్ పార్టీ గెలిస్తే ప్రత్యేక హోదా ఇస్తుందని తెలియచేసారు. 

ఆంధ్రప్రదేశ్లో పార్టీ గత వైభవాన్ని తిరిగి పొందుతుందని, ఎన్డీయే ప్రభుత్వంతో ప్రజలందరూ విసుగు చెందారని, కాంగ్రెస్ తిరిగి అధికారంలోకి రావటాన్ని ప్రజలు కోరుకుంటున్నారని ఆయన అన్నారు. రాష్ట్రంలోని నాయకులు మరియు కార్యకర్తల అభిప్రాయం మేరకు కాంగ్రెస్ పార్టీ మొత్తం 175 అసెంబ్లీ స్థానాలకు సొంతంగా పోటీ చేస్తుందని చాందీ అన్నారు. 

మేము పార్టీ తరపున 44,000 బూత్-స్థాయి కమిటీలను ఏర్పాటు చేయబోతున్నాం. అక్టోబర్ 2 (గాంధీ జయంతి) నుండి ఇంటింటికీ ప్రచారం చేయనున్నామని, ఇది మాజీ ప్రధానమంత్రి ఇందిరా గాంధీ జయంతి అయిన నవంబర్ 19 న ముగియనుందని ఆయన వివరించారు. 

యాహూ మెసెంజర్ ఇక గతమే
ఒకప్పుడు చాటింగ్ అంటే యాహూ మెసెంజర్ అనే అర్థం వచ్చేది. కొన్నేళ్ల పాటు మెయిల్, మెసెంజర్ సర్వీసుల్లో అగ్రస్థానాన్ని అలంకరించిన యాహూ ఇప్పుడు యూజర్లను కోల్పోయి కష్టాల్లో ఉంది. ఈ సంస్థ ఇవాల్టి నుండి మెసెంజర్ సేవలను నిలిపివేస్తున్నట్లు ప్రకటించింది. 

యాహూ మెసెంజర్ సేవలు  1998 లో ప్రారంభమైయ్యాయి. చాలామంది ఈ సేవలు ఆపివేయటం బాధాకరమని ట్వీట్లు చేస్తున్నారు. దీనితో తమకు ఉన్న అనుబంధాన్ని నెమరువేసుకుంటున్నారు. అయితే మెసెంజర్ లో ఉన్న డాటాను ఆరు నెలల లోపల డౌన్లోడ్ చేసుకోవలసి ఉంటుందని, ఆ తర్వాత అది అందుబాటులో ఉండదని సంస్థ ప్రకటించింది. త్వరలో స్కిరిల్ పేరుతొ కొత్త మెసెంజర్, సోషల్ మీడియా ఆప్ ను ఈ సంస్థ విడుదల చేయనుంది.  

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget